જો કરવા જઈ રહ્યા હોવ લગ્ન, તો આ 7 વચન જાણવાં છે જરૂરી

Please log in or register to like posts.
News

પત્નીને આ સાત વચન આપવાં પડશે

લગ્ન એક અતૂટ બંધન છે, જે આજીવન પતિ-પત્નીને એક સૂત્રમાં પરોવીને રાખે છે. આ સંબંધને ઉંમરભર નિભાવવા માટે પતિ-પત્ની બંને એકબીજાને સાત વચન આપે છે અને ત્યાર બાદ જ લગ્ન પૂર્ણ માનવામાં આવે છે. આ સાત વચનો લીધાં બાદ કન્યા વરને પોતાના પતિના સ્વરૂપમાં સ્વીકાર કરી શકે છે. તમામ દેવી-દેવતાઓ અને અગ્નિને સાક્ષી માનીને આ સાત વચન આપવામાં આવે છે. લગ્ન પહેલાં તમે પણ જાણી લો, કયાં છે આ સાત વચન…

પ્રથમ વચન

તીર્થવ્રતોદ્યાપન યજ્ઞકર્મ મયા સહૈવ પ્રિયવયં કુર્યાં:
વામાંગમાયામિ તદા ત્વદીયં બ્રવીતિ વાક્યં પ્રથમં કુમારી!!

કન્યા વરને કહે છે કે, જો તમે કોઈ પણ તીર્થયાત્રા પર જાવ તો મને પણ પોતાની સાથે લઈ જજો, કોઈ વ્રત-ઉપવાસ અથવા અન્ય ધાર્મિક કાર્યોમાં આજની જેમ મને પણ વામ ભાગમાં (પુરુષનું ડાબું અંગ એટલે કે પત્નીના અર્થમાં) અવશ્ય સ્થાન આપો. જો તમે તેનો સ્વીકાર કરો છો તો હું તમારા વામાંગમાં આવવાનું સ્વીકાર કરું છું. આ વચનનું મહત્ત્વ છે કે, જે ધર્માનુષ્ઠાનને પતિ-પત્ની મળીને કરે છે, તે સુખદ ફળદાયક હોય છે.

દ્વિતીય વચન

પૂજ્યો યથા સ્વૌ પિતરૌ મમાપિ તથેશભક્તો નિજકર્મ કુર્યાં:
વામાંગમાયામિ તદા ત્વદીયં બ્રવીતિ કન્યા વચનં દ્વિતીયમ!!

વર પાસે બીજા વચનમાં કન્યા એવું માગે છે કે, જે રીતે તમે માતાપિતાનું સ્નમાન કરો છો, તે જ રીતે મારાં માતાપિતાનું સન્માન કરો. આ વચનથી કન્યાની દૂરદર્શિતાનો આભાસ થાય છે. જો પતિ પણ પત્નીના પરિવારજનોને બરાબર સન્માન આપે તો પરસ્પર સંબંધ સહજ અને સરળ થઈ જાય છે.

ત્રીજું વચન

જીવનમ અવસ્થાત્રયે મમ પાલનાં કુર્યાત,
વામાંગંયામિ તદા ત્વદીયં બ્રવીતિ કન્યા વચનં તૃતીયં!!

ત્રીજા વચનમાં કન્યા કહે છે કે, તમને મને એ વચન આપો કે તમે જીવનની ત્રણ અવસ્થાઓ – યુવાવસ્થા, પ્રૌઢાવસ્થા અને વૃદ્ધાવસ્થામાં મારો સાથ નિભાવશો તો જ હું તમારા વામાંગમાં આવવા તૈયાર છું.

ચોથું વચન

કુટુમ્બસંપાલનસર્વકાર્ય કર્તુ પ્રતિજ્ઞાં યદિ કાતં કુર્યા:
વામાંગમાયામિ તદા ત્વદીયં બ્રવીતિ કન્યા વચનં ચતુર્થં!!

ચોથા વચનમાં કન્યા વરને કહે છે કે, અત્યાર સુધી તમે પરિવારની તમામ જવાબદારીઓમાંથી મુક્ત હતા. હવે તમે વિવાહના બંધનમાં બંધાવા જઈ રહ્યા છો, તો ઘરની તમામ આવશ્યકતાઓને પૂરાં કરવાની જવાબદારી તમારી છે. જો તમે તમારી જવાબદારીઓને નિભાવવાનો સંકલ્પ લો છો તો હું તમારી અર્ધાંગિની બનવા તૈયાર છું.

પાંચમું વચન

સ્વસદ્યકાર્યે વ્યવહારકર્મણ્યે વ્યયે મામાપિ મન્ત્રયેથા,
વામાંગમાયામિ તદા ત્વદીયં બ્રૂતે વચઃ પંચમત્ર કન્યા!!

આ વચનમાં કન્યા કહે છે કે, પોતાનાં ઘરનાં કાર્યોમાં, લગ્ન વગેરે, લેવડદેવડ અથવા અન્ય કોઈ કાર્યમાં ખર્ચ માટે તમે મારી સલાહ લેશો તો હું તમારા વામાંગમાં આવવાનું સ્વીકાર કરું છું. આ વચન આજકાલના પરિપ્રેક્ષ્યમાં ઘણું મહત્ત્વ ધરાવે છે. ઘણા લોકો કોઈ પણ બાબત અંગે પત્નીની સલાહ લેવાનું આવશ્યક સમજતા નથી. જો કોઈ પણ કાર્યને કરતા પહેલાં પત્ની સાથે મંત્રણા કરી લેવામાં આવે તો તેનાથી પત્નીનું સન્માન વધે છે. આ સાથે તેને તેના અધિકારો પ્રત્યે સંતુષ્ટિનો પણ આભાસ થાય છે.

છઠ્ઠું વચન

ન મેપમાનમં સવિધે સખીનાં દ્યૂતં ન વા દુર્વ્યસનં ભંજશ્વેત,
વામામ્યગમાયામિ તદા ત્વદીયં બ્રવીતિ કન્યા વચનં ચ ષષ્ઠમ!!

આ વચનમાં કન્યા વરને કહે છે કે, ઘરના બાકી સભ્યો અથવા અન્ય બહારના લોકો સામે તમે મારું અપમાન નહિ કરો. ખુદને તમામ પ્રકારનાં દુર્વ્યસનોથી દૂર રાખી મારી સાથે સદૈવ સારો વર્તાવ કરશો તો હું તમારી પત્ની બનવાનું સ્વીકાર કરું છું.

સાતમું વચન

પરસ્ત્રીયં માતૃસમાં સમીક્ષ્ય સ્નેહં સદા ચેન્મયિ કાન્ય કુર્યા,
વામાંગમાયામિ તદા ત્વદીયં બ્રૂતે વચઃ સપ્તમમત્ર કન્યા!!

સાતમા અને અંતિમ વચનમાં કન્યા માગે છે કે, જો તમે પરસ્ત્રીને મા સમાન સમજશો અને આપણા બેના સંબંધો વચ્ચે કોઈ ત્રીજાને નહિ લાવો તો હું તમારા વામાંગમાં આવવાનો સ્વીકાર કરું છું.

 

Source: Iamgujarat

Advertisements

Comments

comments