એશિયાના સૌથી ધનિક વ્યક્તિ મુકેશ અંબાણીએ તાજેતરમાં જ બ્રિટનની આઇકોનિક ‘કન્ટ્રી ક્લબ સ્ટોક પાર્ક હોટલ’ 592 કરોડમાં ખરીદી છે . આ સાથે ‘સ્ટોક પાર્ક’ હવે મુકેશ અંબાણીની માલિકીની રિલાયન્સની ‘કન્ઝ્યુમર એન્ડ હોસ્પિટાલિટી એસેટ’ નો ભાગ બનશે. મુકેશ અંબાણી હાલમાં વિશ્વના 13 મા સૌથી ધનિક ઉદ્યોગપતિ છે.
ધ ઇકોનોમિક ટાઇમ્સ અનુસાર, આ સોદો 57 મિલિયન પાઉન્ડ (રૂ592 કરોડ) માં કરવામાં આવ્યો હતો . આ પહેલા વર્ષ 2019 માં મુકેશ અંબાણીએ યુકેની કંપની ‘હેમલીઝ’ પણ ખરીદી હતી. આ કંપની બ્રિટનની સૌથી મોટી અને વિશ્વની અગ્રણી રમકડાની દુકાન તરીકે પ્રખ્યાત છે.
આ હોટલની વિશેષતા શું છે?
યુકેના બકિંગહામશાયરમાં સ્થિત, 900 વર્ષ જૂનું ‘સ્ટોક પાર્ક’ 300 એકરમાં પથરાયેલું છે. આ પાર્કમાં હોટલ, ગોલ્ફ કોર્સ, કન્ટ્રી કલબ, લક્ઝરી સ્પા અને 13 ટેનિસ કોર્ટ પણ છે. હોટેલમાં 49 બેડરૂમ અને 27 હોલ છે. આ સાથે સ્વિમિંગ પૂલ, ફિટનેસ ક્લબ, જિમ જેવી તમામ સુવિધાઓ પણ અહીં ઉપલબ્ધ છે. આ ઉપરાંત 14 એકરમાં ફેલાયેલ એક ખાનગી બગીચો પણ છે.
સ્ટોક પાર્ક એક ખાનગી ઘર તરીકે જ્યોર્જ થર્ડ ના આર્કિટેક્ટ જેમ્સ વોટ દ્વારા 1790 થી 1813 ની વચ્ચે બનાવવામાં આવ્યો હતો. 1908 સુધી, તે એક ખાનગી રહેણાંક વિસ્તાર હતો જેને નિક ‘પા’ લેન જેક્સન દ્વારા ખરીદ્યો હતો. આ બ્રિટનની પ્રથમ કાઉન્ટી ક્લબ છે. સ્ટોક પાર્કનો ‘ગોલ્ફ કોર્સ’ એ યુરોપનો સૌથી પોશ ગોલ્ફ કોર્સ માનવામાં આવે છે.
આ ફિલ્મોનું શૂટિંગ કરવામાં આવ્યું છે
સ્ટોક પાર્કમાં હોલીવુડની ઘણી ફિલ્મોનું શૂટિંગ કરવામાં આવ્યું છે. જેમ્સ બોન્ડ શ્રેણી ‘ગોલ્ડફિંગર’ , જે 1964 માં રીલીઝ થઈ હતી અને 1997 માં ‘ટુમોરો નેવર ડાઇઝ’ પણ અહીં શૂટ કરવામાં આવી છે. 2001 ની ફિલ્મ ‘બ્રિજેટ જોન્સ ડાયરી’ના કેટલાક દ્રશ્યો પણ અહીં શૂટ કરાયા હતા. આ સિવાય નેટફ્લિક્સ પર પ્રસારિત બ્રિટીશ રોયલ ફેમિલી સિરીઝ ‘ધ ક્રાઉન’ પણ અહીં શૂટ કરવામાં આવ્યું છે.
સેલિબ્રિટીઝનું બેસ્ટ ડેસ્ટિનેશન
છેલ્લા ઘણા દાયકાઓથી, ‘સ્ટોક પાર્ક’ ફિલ્મો અને સેલિબ્રિટી કોન્સર્ટ માટે લોકપ્રિય સ્થળ રહ્યું છે. દર વર્ષે દુનિયાભરની અનેક હસ્તીઓ અહીં રજા માટે આવે છે. મુકેશ અંબાણી દ્વારા ખરીદ્યા પછી, ભવિષ્યમાં આપણે તેને ઘણી બોલિવૂડ ફિલ્મોમાં પણ જોઈ શકીએ છીએ. બોલીવુડના ઘણા એવોર્ડ ફંક્શન્સ પણ અહીં જોઇ શકાશે.
હાલમાં ‘સ્ટોક પાર્ક’ ની માલિકી ‘ઇન્ટરનેશનલ ગ્રુપ’ (આઈજી) ની છે . તેનો સંચાલક બ્રિટનનો કિંગ ફેમિલી છે. બ્રિટનનો કિંગ ફેમિલી ઘણા વર્ષોથી તેને વેચવાનો પ્રયત્ન કરી રહ્યો હતો, પરંતુ કોઈ સારો ખરીદદાર શોધી શક્યો નહીં. આ પછી, વર્ષ 2018 માં, કિંગ ફેમિલીએ આ સંપત્તિને બજારમાં લાવવા અને તેના વેચાણની સંભાવનાને શોધવા માટે CBRI જારી કર્યો હતો.
