અમેરિકાથી ભારત પાછા ફરેલા એક ભારતીય નાગરિકે ટ્રાફિક, પાર્કિંગની અછત અને ભીડભાડ અંગે પોતાનો કડવો અનુભવ શેર કર્યો છે, જેનો વીડિયો સોશિયલ મીડિયા પર ઝડપથી વાયરલ થઈ રહ્યો છે.
અમેરિકાથી ભારત પાછા ફરવું એ માત્ર સુવિધા કે આરામદાયક દૈનિક જીવન માટે સાચો નિર્ણય નથી, તેવો દાવો એક એનઆરઆઈ શખ્સે સોશિયલ મીડિયા પર શેર કરેલા વીડિયોમાં કર્યો છે. સોશિયલ મીડિયા પ્લેટફોર્મ ઈન્સ્ટાગ્રામ (Instagram) પર @theabroadlab નામથી વિડીયો શેર કરનાર વનરાજ નામના શખ્સે ભારતીય શહેરોમાં અનુભવાતી દૈનિક મુશ્કેલીઓ અને વસ્તીના દબાણ પર વિગતવાર વાત કરી છે.
અમેરિકાથી ભારત પાછા ફરવું અને મોલ પાર્કિંગનો કડવો અનુભવ
વનરાજે પોતાના વીડિયોમાં એક રવિવારની સાંજે શોપિંગ મોલ જવાનો અનુભવ વર્ણવ્યો હતો. તેમણે જણાવ્યું કે વીકેન્ડ હોવાના કારણે મોલમાં ભારે ભીડ હતી અને માત્ર મોલના પાર્કિંગની લાઈનમાં જ તેમને અને તેમના સાથીને ૨૫ મિનિટ સુધી અટવાઈ રહેવું પડ્યું હતું.
તેમણે ઉમેર્યું કે આ સમસ્યા કોઈ ચોક્કસ મોલના વહીવટની નથી, પરંતુ વધતી જતી જનસંખ્યાનું પરિણામ છે. વિદેશ જેવા ઓછા વસ્તી ધરાવતા વિસ્તારમાંથી આવ્યા બાદ ભારતમાં પ્રવેશતા જ આ તફાવત સ્પષ્ટપણે અનુભવાય છે.
દૈનિક જીવનની સરળતા અને સુગમતાનો અભાવ
એનઆરઆઈ યુવકના જણાવ્યા અનુસાર, વિદેશમાં રહેવાથી દૈનિક કામકાજ ખૂબ જ સરળતાથી પતી જવાની આદત પડી જાય છે. પરંતુ ભારતમાં આવી પહોંચ્યા પછી એ સુગમતા ગાયબ થઈ જાય છે.
“તમને વિદેશમાં રહેવાથી એક ચોક્કસ સરળતાની આદત પડી જાય છે. ત્યાં દરેક કામ ખૂબ જ વ્યવસ્થિત અને સ્મૂથ રીતે થાય છે, જ્યારે ભારતમાં આવી સ્મૂથનેસ જાળવવી મુશ્કેલ બની જાય છે.”
શહેરોમાં યોગ્ય પાર્કિંગ મેળવવું એ અત્યંત પડકારજનક બની ગયું છે. જો વાહન યોગ્ય જગ્યાએ પાર્ક કરવામાં ન આવે, તો તેને ક્રેન દ્વારા ટો (Tow) થઈ જવાનો ભય સતત રહે છે. ભારતમાં પરત ફરતા લોકોએ આ પરિસ્થિતિઓ સાથે સમજોતો કરવો પડે છે.
અમેરિકાથી ભારત પાછા ફરવાના મુદ્દે સોશિયલ મીડિયા પર ચર્ચા
આ વીડિયો વાયરલ થયા બાદ યુઝર્સ તરફથી મિશ્ર પ્રતિક્રિયાઓ જોવા મળી રહી છે. કેટલાક લોકોએ આ વાત સાથે સંમતિ દર્શાવી હતી, તો કેટેલાકે ભારતમાં મળતી કૌટુંબિક હૂંફનો પક્ષ લીધો હતો.
- શહેરી સુવિધાઓની કમી: ઘણા યુઝર્સે સ્વીકાર્યું કે ભારતીય શહેરોમાં પાર્કિંગ, સિવિક સેન્સ (Civic Sense) અને ફૂટપાથની અછત દૈનિક જીવનને મુશ્કેલ બનાવે છે.
- કૌટુંબિક લાગણી અને સસ્તી સેવાઓ: અન્ય યુઝર્સે દલીલ કરી કે ભારતમાં પરિવારનો સાથ, ઘરઘાટીની મદદ અને સસ્તી સ્વાસ્થ્ય સેવાઓ આ બધી તકલીફોને ભૂલાવી દે છે.
- નાગરિક શિસ્તનો પ્રશ્ન: એક યુઝરે લખ્યું કે આ સમસ્યા માત્ર વસ્તીની નથી પરંતુ લોકોમાં નાગરિક શિસ્ત અને રોડ સેન્સના અભાવની છે.
ભાવનાત્મક નિર્ણય અને વાસ્તવિકતા વચ્ચેનો તફાવત
વનરાજે સ્પષ્ટતા કરી કે કૌટુંબિક લાગણી, સંસ્કૃતિ કે પોતાના દેશ પ્રત્યેના પ્રેમથી ભારત પરત ફરવું યોગ્ય હોઈ શકે છે. પરંતુ જો કોઈ વ્યક્તિ માત્ર સુવિધા અને આરામની અપેક્ષા સાથે ભારત આવે છે, તો તેને નિરાશા સાંપડી શકે છે.
નોંધનીય છે કે આ પહેલા જર્મનીથી ૧૫ વર્ષ પછી ભારત પાછી ફરેલી એક મહિલાએ પણ સોશિયલ મીડિયા પર પોતાનો આવો જ અનુભવ વ્યક્ત કર્યો હતો.